من طرف ابوكرشة الإثنين 20 يونيو 2011, 06:10جاتني انا ومجموعة من شباب الديرة شرهة من الأمير الكريم الوليد بن طلال الله يطول لنا بعمره ويعطيه الصحة والعافية
كل واحد جاه مبلغ وقدره وقلنا لازم نمتع أنفسنا كم يوم في الرياض وننسى ايام الفقر
ركبنا في ونيت شبه جديد وكل واحد قط الف ريال قابلة للزيادة في حال الزنقات
ووصلنا الرياض في وقت قياسي ومن شارع لشارع لحد مالقينا الماريوت
طبعا ما توقعنا انه غالي لهالدرجة ولكن ما كان يهمنا
سألنا عن الغرفة وعن السرير والسريرين وقلنا نبي غرفة بسرير لانها ارخص
سكنت انا وطلعوا الشباب على اساس بيدخلون بعدين
لكن الفندق عليه سيكيوريتي مفتحين وبعد بهذله لنص الليل قدروا الشباب يدخلون ويجونني الغرفة
فليناها اناسة وفرفشة وطلبنا من المطعم وهاتك يا توقيع فواتير وكله باسمي ولكن القطة معي
طلبنا عشاء وحلى وقلنا لازم نجرب المساج وكان المساج بميتين ريال
وما درينا ان فيه تفصيخ ملابس، مع انا متعودين نسبح سوا في البركة لكن التفصيخ على السرير كان موقف محرج خاصة مع وجود عامل المساج مع ان ما منه غطوة
المهم صرفنا صرف غير طبيعي
علي نام على السرير لأنه متعود على الاسرة وعنده كرفاجة في البيت
وانا ومجلي نمنا على الارض عشان ما نطيح ونتكسر
من قبل الظهر والتلفون يدق علينا
رديت لقيت الريسبشن يقول تكملون يوم ثاني والا تطلعون
قلت اكيد بنطلع
قال: يا الله لكم الى الساعة 12
لمينا اغراضنا وحاسبنا الفندق وركبنا سيارتنا في عز الظهر وما ندري وين نروح
حتى النوم ما بعد شبعنا نوم
@@@@@
احلى ما في الفندق الاصنصير مريح في الطلوع والنزول ويوسع الصدر ، هذا من وجهة نظري انا، واما مجلي فيقول احلى ما في الفندق المساج يقول انه يدغدغ ويلين الجلد وقرر انه يتعلم المساج عشان يهمز رجول ابوه مضبوط
واما علي فانهبل على القنوات الفضائية وينام والتلفزيون يشتغل
كان يوم حلو جدا، ولكن يا فرحة ما تمت
الفلوس اللي معنا ما تكفي الا لشقة مفروشة رخيصة ولفينا الرياض وبعد شقا لقينا وحدة بمئة ريال في اليوم وبسرير واحد بس والباقي على طراحات في الارض
انا عن نفسي متعود على النوم على الدواشق وفي حياتي ماكان لي غرفة نوم ودايم ارقد في المجلس أو المقلط واحيانا على السطح او في الحوش
كان لازم نوفر فلوسنا عشان نعيش اطول فترة في الرياض وطبعا راح نقول انا قضينا كل هالفترة في الماريوت وعندنا اثباتات على صدق كلامنا لانا خذنا فواتير المطاعم والمينيو والصابون والشامبو والكاس وكل اللي نقدر عليه حتى الكبريت خذناه والدفتر وكل شي نقدر عليه
كل يوم نطله نتمشى في الرياض ونعود ننام بس، وعلي يبغى يتفرج على التلفزيون بس
وفي يوم وحنا راجعين لقينا سيارة واحد من اهل الديرة عند الشقق وشكله ساكن فيها، وعقبها صرنا خايفين لا يشوفنا احد من اهل الديرة ويعلم علينا
دقينا اللطمة ودخلنا ونمنا ومن الصباح طلعنا وحاسبنا الشقة
الفلوس اللي معنا يادوب تكفي اكل وبس، وعشان كذا قررنا نقيل تحت كبري في الظهر وفي الليل ننام في أي مكان
وبهذي الطريقة نقدر نكمل اسبوع في الرياض
من النوم في الماريوت الى النوم تحت كبري ما كان فيه فرق كبير جدا
لكن ضاع حلمنا في تشبيك البنات، لاننا اول ما وصلنا الرياض كان عندنا هدف اننا نرقم بنات على رقم الفندق او رقم تلفون اهل مجلي في الديرة
مجلي كان مانع احد يرد على التلفون غيره حتى وهو ما هو موجود ما احد يرفع السماعة
كانت الرياض بالنسبة لنا مثل بتايا او بانكوك وكان عندنا احلام كبيرة وانتهت بالنوم تحت كبري في عز الصيف
في الليل كان الجو بارد او معقول عشان ما اكذب لكن لعب فينا الناموس
في حياتنا ما شفنا مثل ناموس الرياض تحسه هليكوبتر ماهو حشرة وبعدين يمص في المرة الوحدة ربع لتر واكثر وفي الصباح نقوم وعندنا فقر دم ووجوهنا منقطة
مشكلتنا ما ندري وش نقول للجماعة اذا رجعنا وعلينا اثار الناموس
» اكتشف مع مزايا للتطوير العقارى عجيبة جديدة على شاطىء مطروح جديد على شاطىيء مطروح ( مطروح هايتس )
» 5 ملايين جنيه من مزايا جروب لدعم المشروعات السياحية بمطروح
» النائب العام يحيل بلاغ ضد «خبراء وزارة العدل» لنيابة أمن الدولة العليا
» بلاغ يتهم مدير مكتب مساعد وزير الداخلية بالتلاعب بقاعدة بيانات الأمن العام
» هروب طارق محمد الطويل من مصر وضياع أموال المواطنين قرار بسحب أرض الربوة الهادئة رقم 159 في 2/9 عام 2012
» مزايا للتطوير العقاري وصحفيو الوهم والابتزاز
» مزايا جروب اسم له تاريخ
» اكتشف مع مزايا للتطوير العقارى عجيبة جديدة على شاطىء مطروح جديد على شاطىيء مطروح ( مطروح هايتس )